当前位置: > 最新动态 >

老广州牛杂街头小食记

  老广州牛杂街头小食记,牛杂系广州嘅传统街头小食,作为土生土长嘅广州人,睇到佢而家嘅变化,其实有小小心悒。

  首先系价钱,而家食牛杂贵过食猪肉。呢句当然系气话,猪肉几时都贵唔过出去食。不过系下九路一间老字号食碗牛杂、牛三星,分分钟要十几廿蚊。呢个时候,你就会好怀念,细个幼儿园放学,妈妈买完餸,带住你系长寿路一个街口牛三星档,点一碗三星,你食少少牛杂同咸酸萝卜、青瓜,妈妈食三星嘅日子。嗰阵嘅牛杂,就系真正意义上嘅街头小食,系饭前、放工后用嚟垫下肚,过下口瘾嘅大件夹抵食货。而家?十几廿蚊碗斋牛杂,边有人食得开怀?

  好,你话你收得贵,味道喺番度,我都唔会觉得唔抵。弊在而家牛杂虽然广州度度都有,但系啲味真系好嘛嘛。一系唔入味,淡谬谬,仲好韧;一系加啲牛肉丸、墨鱼丸落去一齐煮,煮到唔同味,你话点好食。

  牛杂好多地方都有,做法亦都唔同。广州嘅就中意焖,焖好就食。焖牛杂一般用好多调料,文火慢慢焖,仲要加小小片糖吊味,唔好嘥咗啲靓汁,就放萝卜落去索味。呢种做法渐渐变成习惯,所以牛杂一定配萝卜食。睇煮啲浓浓嘅汤汁滚起,噗噗声,一阵阵牛杂味飘向街心。呢啲就系传统味道嘅牛杂。可惜,可以见到呢种诱人场景嘅摊档非常少。

  曾经上过电视嘅一档阿婆做嘅牛杂,我去探访过,好失望。当时我哋按开档时间去到,已经有十几二十人排队等,我哋就跟系龙尾。等咗半个钟,条队先移咗几个人。等嘅时候我先发觉,虽然好多人排队,但系阿婆一见到熟人就畀佢先买。所以我即刻过档———广州人做生意最讲究规矩,档主咁样破坏规矩,牛杂就冇咗份人情味。

  我极力推荐东山口,7中附近一条巷口嘅走鬼牛杂档,冇店名。佢到而家都仲保持住大件夹抵食嘅做法,牛杂足料又平。食一两蚊,已经有满满嘅一小盒,味道就系原广州味,又香又浓,得闲试下。